Nəzrin Məmmədova hələ məktəblidir, amma nəticələri və məqsədləri ilə artıq fərqlənməyi bacarıb. Bu il martın 2-də keçirilmiş buraxılış imtahanında maksimum bal toplayan Nəzrin təkcə məktəbin deyil, bütövlükdə rayonun fəxrinə çevrilib.

“Azərbaycan müəllimi” qəzeti Şəmkir rayonu Kür qəsəbə H.Z.Tağıyev adına tam orta məktəbinin şagirdi Nəzrinin təəssüratlarını dinləyib.

Bir sinif, iki bacı, bir məqsəd

Nəzrinin təhsil həyatı adi bir məktəbli hekayəsi deyil. O, böyük bacısı Nurayla eyni sinifdə oxuyur. Valideynləri hər iki bacının birlikdə böyüməsi və eyni təhsil mühitində inkişaf etməsi üçün Nəzrini məktəb yaşından əvvəl – cəmi 5 yaşında imtahanla məktəbə yazdırıblar.

Hazırda hər iki bacı Azərbaycan Tibb Universitetinin “Müalicə işi” ixtisasına qəbul olmaq üçün hazırlaşır. Bacısı Nuray Məmmədova da buraxılış imtahanında 247 bal toplayaraq məktəbin üçüncüsü olub. Bu nəticələr ailədə təhsilin nə qədər önəmli yer tutduğunu açıq şəkildə göstərir.

Əzmkarlıq və intizam – nəticənin sirri

Uşaqlıqdan fərqliliyi ilə seçilən Nəzrin 9-cu sinif buraxılış imtahanlarında da yüksək nəticə göstərərək qırmızı attestata layiq görülüb: 

“Məncə, yüksək nəticə həm zəkanın, həm də əzmkarlığın göstəricisidir. Amma əzmkarlığın rolu daha böyükdür”.

Nəzrin biliklərini testlərlə möhkəmləndirir, hər bir mövzunu mükəmməl şəkildə öyrənməyə çalışır. Ən çox diqqət ayırdığı fənn isə riyaziyyatdır. Onun fikrincə, bu fənn insana həm düşünməyi, həm də problemi həll etməyi öyrədir. Nəzrin imtahana hazırlıqda sınaq testlərini ən effektiv metod hesab edir:

“Məni ən çox sınaq imtahanlarında yüksək bal toplamağım motivasiya edib. Düşünürəm ki, testlər imtahana hazırlaşmaq üçün olduqca effektlidir”.

Gələcəyini Azərbaycan Tibb Universitetində görən Nəzrin özünü arzusuna çatmaq üçün də tam hazır hesab edir: “Özümü gələcəkdə savadlı və faydalı bir həkim kimi görürəm”.

Sosial şəbəkələrdən uzaq, kitablara yaxın

Gənclərin əksəriyyəti vaxtlarının çoxunu sosial şəbəkələrdə keçirdiyi halda Nəzrin və Nuray tam fərqli yol seçiblər. Onlar sosial şəbəkələrdən istifadə etmirlər, əvəzində vaxtlarını planlı şəkildə dərsə və öyrəndiklərinin təkrarına ayırırlar.

“Vaxtımızı düzgün bölməliyik. Bilmədiyimiz və ya zəif bildiyimiz mövzular üzərində daha çox dayanmalıyıq”, – deyə bacılar bildirir.

Anadan güc, atadan ilham

Bu uğurun arxasında yalnız Nəzrin və Nurayın əzmkarlığı deyil, ailənin sarsılmaz dəstəyi də dayanır. Anası Ülviyyə Məmmədova deyir:

“Qızlarımı ev işlərinə cəlb etmirəm. Düzü, heç vaxt onlara “niyə oxumursunuz?” da deməmişəm. Saatlarla oxuyurlar. Kitabdan başqa heç nəyə vaxt ayırmayıblar. Qonaqlıqlara getməyiblər, evdə internetimiz də olmayıb”.

Ülviyyə xanım əlavə edir ki, övladları həmişə məqsədyönlü olublar. Qızlarının həkim olmaq istəyi isə atalarından gəlir:

“Ataları uşaq vaxtlarından onların tibb sahəsinə yönəlməsini istəyirdi. Onlar da bu arzunu illərlə ürəklərində daşıyıblar”.

Şagirdlərə tövsiyəsi

Nəzrin uğurlu gənc olaraq təcrübəsini həmyaşları ilə bölüşməyi də unutmur:

“Çox çalışsınlar, vaxtlarını düzgün bölsünlər və sosial şəbəkələrdən, yayındırıcı faktorlardan uzaq dursunlar. Məncə, maksimum bal toplayan hər bir şagird əzmkar olmalı, çox çalışmalı və hər şeyi mükəmməl öyrənməlidir”.