“Uşaq və müəllimlərə bullinqin tərifi, növləri və nəticələri haqqında müntəzəm təlimlər keçirilməlidir. Həmçinin uşaqlar, müəllimlər, valideynlər, xüsusilə məktəb psixoloqları buller və qurbanını müəyyən etməyi bacarmalıdırlar”.

“Azərbaycan müəllimi” xəbər verir ki, bu barədə Ailə, Qadın və Uşaq Problemləri üzrə Dövlət Komitəsi tərəfindən hazırlanan "Yetkinlik yaşına çatmayanlar arasında aqressiv davranış: Bullinq" adlı nəşrdə məktəblərə, cəmiyyətə, dövlətə yönəlik təkliflər bölməsində qeyd edilib.

Bildirilib ki, uşaqlar məktəbdə ya buller, ya bullinq qurbanı, ya da müşahidəçidirlər. Hər üç halda onların bilməli olduqları məsələlər var:

“Məktəb mühiti elə dizayn olunmalıdır ki, uşaqlar özlərini təhlükəsiz, fiziki və psixoloji bullinqdən azad hiss edə bilsinlər. Bunun üçün dəhlizlər, sanitar qovşaqları və məktəbin həyətyanı sahəsi bir daha nəzərdən keçirilməlidir”.

Nəşrdə qeyd edilib ki, uşaqların bullinq hadisələri barədə anonim məlumat verə bildiyi təhlükəsiz rabitə kanalları yaradılmalıdır (məsələn, anonim poçt).

“Bullinqə məruz qalan uşaqlara dəstək olmaq və bullerlərin davranışlarını dəyişdirmək məqsədilə həmin yaş qrupundakı uşaqlar üçün psixoloji dəstək proqramları həyata keçirilməlidir. Bunlar fərdi və qrup terapiyaları, psixoloji sağlamlığı inkişaf etdirən görüşlər, psixoloji özünüdərki artıran seminarlar ola bilər”.

Daha bir təklif isə müəllimlərin bullinqə qarşı müntəzəm təlimlərə cəlb edilməsi ilə bağlı olub. Qeyd edilib ki, müəllimlərin bullinq hallarına müdaxilə bacarıqları təkmilləşdirilməlidir. Onlar nəyin bullinq olduğunu yaxşı anlamalıdırlar ki, özləri də bilmədən uşaqlara qarşı bullinq etmiş olmasınlar. Müəllimlər bullinqin nəticələrini dərindən dərk etsələr, bullinq davranışını digər mənfi davranışlardan ayırd edərlər və bu davranışları adi nadinclik kimi qəbul edib həllini uşaqların öhdəsinə buraxmazlar:

“Məktəbin kollektivi, valideynlər və uşaqlar arasında açıq və effektiv ünsiyyət qurulmalı, bullinqlə bağlı problemlər vaxtında aşkar olunaraq həll edilməlidir. Valideynlərin övladlarına bullinqini məktəb müəyyən etməli, məktəbdə baş verən bullinqi isə valideyn, müəllim və psixoloq ortaya çıxarmalıdır. Bullinqi vaxtında müəyyən etmək bu əməllərin qarşısını almağa kifayə etmir, əlavə olaraq, tərəflərin birgə işi, ahəngdar addımlar atması lazımdır”.