“4-5 yaş və ya 3-4 yaşlı uşaqların məktəbəqədər təhsilə cəlbinin əhatə dairəsini artırmaq əsas məqsədlərdən biridir. Bununla bağlı ən böyük maneələrdən biri hazırda tədqiq etdiyimiz və sovet dövründən miras qalmış uşaq bağçası və ya məktəbəqədər hazırlıq modelidir”.

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün keçirilən “Məktəbəqədər təhsildə keyfiyyətə yeni baxış” adlı II beynəlxalq konfransda çıxışı zamanı deyib. 

Nazir “Bu model niyə problem yaradır?” sualı ilə çıxışına davam edib:

“Çünki uşaq bağçası modeli, əsasən, uşaqlara qayğı göstərməyə yönəlib. Burada təhsil komponenti ikinci plandadır. Bağçada əsas prioritetlər arasında uşaqların gün ərzində dörd dəfə qidalanması, onların isti və rahat mühitdə, baxıcıların isə daim iş başında olması dayanır. Lakin təhsil komponentinə ənənəvi olaraq kifayət qədər az diqqət yetirilir”.

Emin Əmrullayev əlavə edib ki, digər bir məsələ bu modelin bahalı olmasıdır. Hər bir uşağa çəkilən xərc yüksək olduğu üçün bağçaların əhatə dairəsini genişləndirmək çətinləşir:

“Bu səbəbdən sovet dövründə və sonrakı illərdə məktəbəqədər təhsilin əhatəli olması imkanları məhdud idi. Çünki bahalı bir modeli genişləndirmək iqtisadi baxımdan çətindir. Açığını desək, bu məsələ bəlkə də populyar fikirlərdən uzaqdır, lakin həqiqətdir. Əgər kimsə bahalı bir modeli genişləndirməyin mümkün olduğunu düşünürsə, biz həmin şəxslərdən bu yanaşmanı öyrənməyə hazırıq”.