Azərbaycan Kosmik Agentliyinin (“Azərkosmos”) nəzdində fəaliyyət göstərən KOSMİK Akademiyada ölkəmizin universitetlərinin tələbələrinin kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində təcrübə mübadiləsi səfəri layihəsinin rəsmi açılış mərasimi keçirilib.

“Azərkosmos”dan “Azərbaycan müəllimi”nə bildirilib ki, tədbirdə “Azərkosmos” İdarə Heyətinin sədri vəzifəsini müvəqqəti icra edən Dunay Bədirxanov, İnsan resurslarının idarə edilməsi və sənədləşmə departamentinin direktoru İnarə İbrahimxəlilova, SABAH qrupları İcra Komitəsinin rəhbəri, Elm və Ali Təhsil üzrə Dövlət Agentliyinin sektor müdiri Elza Səmədova, KOSMİK Akademiyanın rəhbəri İmran Muxtarov və iştirakçı universitetlərin SABAH mərkəzlərinin direktorları iştirak ediblər.

Layihə “Azərkosmos”un KOSMİK Akademiyasının təşkilatçılığı və “GUHEM” - Gökmen Uzay ve Havacılık Merkezinin dəstəyi ilə həyata keçiriləcək. Səfər müddətində, martın 14-dən 19-dək Azərbaycanın 14 universitetini təmsil edən 24 nəfərdən ibarət tələbə heyəti, gənc alim və təhsil işçiləri Türkiyənin müxtəlif aparıcı kosmos və aviasiya təşkilatları ilə tanış olacaq və bu sahələrdə təcrübə mübadiləsi aparacaqlar.

Səfər çərçivəsində tələbələr, Bursa şəhərində yerləşən “GUHEM”, “BUTEKOM”, Ankara şəhərində yerləşən Türkiyə Aerokosmik Agentliyi, “TürkSat” şirkəti, “STM” şirkəti, “HAVELSAN”, “TUBİTAK”, “PLAN-S”, Orta Doğu Texniki Universiteti, İstanbul şəhərində yerləşən “Baykar Teknoloji” (Bayraktar qrup) şirkəti, “TUSAŞ”, İstanbul Texnopark, Bilişim Vadisi və bir sıra digər tanınmış təhsil və texnologiya mərkəzlərində nəzəri və praktiki təcrübə mübadiləsi keçəcəklər.

Layihənin məqsədi gənc mütəxəssislərin kosmos, aerokosmos və digər texnoloji sahələrdə nəzəri və praktiki biliklərini artırmaq, həmçinin beynəlxalq təcrübə mübadiləsi keçirərək, Azərbaycan gənclərinin sözügedən sahələrdə gələcəyin güclü mütəxəssisləri kimi inkişaf etmələrinə dəstək olmaq, bununla da Azərbaycanda peşəkar kadrların və insan kapitalının inkişafına dəstək göstərməkdir.

Qeyd edək ki, “GUHEM” Bursa Ticarət və Sənaye Palatasının (BTSO) rəhbərliyi altında, Bursa Böyükşəhər Bələdiyyəsi və Türkiyənin Elmi və Texnoloji Araşdırmalar Şurası (TÜBİTAK) ilə əməkdaşlıq çərçivəsində inşa edilmiş 13 min kvadratmetr sahəyə sahib kosmik-innovasiya mərkəzidir.