Qəbələ Dövlət Peşə Təhsil Mərkəzi tələbə və məzunlar üçün iş imkanları qrupu yaradıb
Qəbələ Dövlət Peşə Təhsil Mərkəzi tələbə və məzunları üçün yeni rəqəmsal karyera platforması istifadəyə verib.
"Azərbaycan müəllimi" xəbər verir ki, mərkəz “Tələbə və məzunlar üçün iş və karyera imkanları” adlı WhatsApp məlumatlandırma qrupu yaradıb. Bu təşəbbüs peşə təhsili alan gənclərin və məzunların əmək bazarına inteqrasiyasını sürətləndirmək və iş dünyasına çıxışını daha da asanlaşdırmaq məqsədi daşıyır.
Yeni yaradılan operativ məlumatlandırma qrupu vasitəsilə tələbə və məzunlara aşağıdakı imkanlar təqdim olunacaq:
- Aktual vakansiyalar: İşəgötürənlər tərəfindən birbaşa mərkəzə təqdim olunan ən son iş elanları.
- Təcrübə proqramları: Tələbələrin təhsil alarkən praktiki biliklər qazanması üçün müxtəlif şirkətlərlə əməkdaşlıq fürsətləri.
- İnkişaf fürsətləri: Yeni peşə sahələri və fərdi inkişaf layihələri barədə mütəmadi məlumatlar.
Layihənin əsas hədəfi peşə təhsili müəssisəsi ilə əmək bazarı arasındakı əlaqələri daha da gücləndirmək və gənc mütəxəssislərin iş tapma müddətini minimuma endirməkdir.
İş və karyera imkanlarından xəbərdar olmaq üçün qrupa qoşulun.
