Elm və Təhsil Fondunun qrant müsabiqəsinin qalibləri müəyyənləşib
SOCAR-ın Elm və Təhsil Fondunun 2025-ci il üzrə Azərbaycan Respublikası Elm və Təhsil Nazirliyinin tabeliyində fəaliyyət göstərən elmi müəssisələr arasında elan etdiyi qrant müsabiqəsinin qalibləri müəyyən edilib.
"Azərbaycan müəllimi" xəbər verir ki, müsabiqə Azərbaycan Respublikasında neft, neft-kimya və qaz sənayesi, alternativ enerji və yaşıl energetika sahələri üzrə aktual elmi problemlərin nəzəri və praktiki aspektlərinin tədqiqi, innovativ və tətbiqyönümlü nəticələrin əldə olunması, eləcə də texnoloji və kommersiya potensialına malik elmi fəaliyyətin təşviqi məqsədilə təşkil olunub.
Layihələr yataqların axtarışı, kəşfiyyatı, işlənməsi, karbohidrogen hasilatı, nəqli, emalı və sahənin dayanıqlı inkişafı kimi prioritet istiqamətləri əhatə edir.
SOCAR-ın Elm və Təhsil Fondunun İdarə Heyətinin müvafiq qərarına əsasən, ekspert rəyləri nəzərə alınmaqla Müsabiqə Komissiyasının qiymətləndirməsi nəticəsində Elm və Təhsil Nazirliyinin tabeliyində fəaliyyət göstərən elmi müəssisələrin aşağıdakı layihələri qalib elan olunub:
– Kation-kation və anion-anion əvəzləmələrində defektlərin yaranmasının nəzəri və spektroskopik tədqiqi (Fizika İnstitutu PHŞ);
– Quyuların sulaşmasına qarşı perspektiv mübarizə üsullarının müqayisəli təhlili və səmərəli texnoloji həllərin işlənməsi (Neft və Qaz İnstitutu);
– Azərbaycanda terrigen-karbonat qarışıq kollektor layları olan neft yataqlarının hasilat perspektivliyinin qiymətləndirilməsi (Neft və Qaz İnstitutu);
– Qum təzahürlü sulaşmış quyularda neft hasilatının artırılması üçün in-situ gel əmələ gətirən nano-SiO₂/akrilamid əsaslı tərkibin işlənməsi (Kimya İnstitutu PHŞ);
– Ştanqlı nasosla istismar olunan quyularda nasosun optimal iş rejiminin təyini üçün proqram təminatının (kompüter simulyatorunun) yaradılması (Riyaziyyat İnstitutu PHŞ);
– Az debitli quyulardan neft hasilatında neft-su nisbətinin artırılması üçün texnologiyaların və idarəetmə sisteminin işlənilməsi (Riyaziyyat İnstitutu PHŞ);
– Abşeron neftli-qazlı rayonunda yataqların işlənməsi ilə bağlı şaquli hərəkətlərin InSAR texnologiyası vasitəsilə monitorinqi və risklərin qiymətləndirilməsi (Geologiya və Geofizika İnstitutu);
– Neft-qaz sənayesi üçün təbii azotlu üzvi birləşmələr əsasında çoxfunksiyalı inhibitor sistemlərinin sintezi və tətbiqi (Akademik Y.Məmmədəliyev adına Neft-Kimya Prosesləri İnstitutu);
– Neftçıxarmada rəqəmsal xidmət infrastrukturunun qiymətləndirilməsi modelləri və alqoritmlərinin işlənilməsi (Riyaziyyat İnstitutu PHŞ);
– Yeni geofiziki yanaşmalarla qeyri-struktur tipli tələlərin aşkarlanma metodikasının təkmilləşdirilməsi (Geologiya və Geofizika İnstitutu);
– Modifikasiya olunmuş silisium əsaslı nanohissəciklərin neft məhsullarının fiziki xüsusiyyətlərinə təsiri (Fizika İnstitutu PHŞ);
– Neft hasilatında enerji sərfinin optimallaşdırılması üçün dərin təlim modelləri (İnformasiya Texnologiyaları İnstitutu);
–Karbohidrogen tullantıları ilə ətraf mühitin çirklənməsinin riyazi modelləşdirilməsi və təsirlərin azaldılması yollarının işlənməsi (Riyaziyyat İnstitutu PHŞ);
– Qazkondensat yataqlarının istismarı zamanı termodinamik proseslərin idarə edilməsi üsullarının təkmilləşdirilməsi (Neft və Qaz İnstitutu);
– Ekoloji təmiz mühərrik yanacaqlarının istehsal texnologiyası (Akademik Y.Məmmədəliyev ad. Neft-Kimya Prosesləri İnstitutu);
– Neftin axıcılığının artırılmasında multifunksional inhibitorların təsirinin spektral, molekulyar və reoloji tədqiqi (Neft-Kimya Prosesləri İnstitutu);
– Abşeron yarımadası yataqlarında istismar obyektlərinin tükənmə dərəcəsinin təhlili və qalıq neft hasilatı üçün perspektiv obyektlərin müəyyənləşdirilməsi (Geologiya və Geofizika İnstitutu);
– Azərbaycanın quru ərazilərində və Cənubi Xəzər hövzəsində qeyri-ənənəvi neft-qaz tələlərinin axtarışı metodologiyasının işlənməsi (Neft və Qaz İnstitutu);
– Neftlə çirklənmiş torpaqlarda polisiklik aromatik karbohidrogenlərin parçalanması üçün yeni hibrid metodoloji yanaşma (Neft-Kimya Prosesləri İnstitutu);
– Neft sənayesi üçün yeni nəsil nanokompozit materialların alınması (Fizika İnstitutu PHŞ);
– Cənubi Xəzər çökəkliyində məhsuldar çöküntülərin neft-qaz potensialının qiymətləndirilməsi (Neft və Qaz İnstitutu);
– Böyük Qafqazın cənub yamacında qeyri-struktur tələlərin paleorekonstruksiyası və geokimyəvi təhlili (Geologiya və Geofizika İnstitutu);
– Balaxanı yatağında neftverimin mikrobioloji üsulla artırılması (Kimya İnstitutu PHŞ);
– Xəzər dənizi neft-qaz infrastrukturunda korroziya inhibitorlarının optimallaşdırılmasında süni intellektin tətbiqi (Neft-Kimya Prosesləri İnstitutu).
