Göyçay Dövlət İdarəetmə və Texnologiya Kollecinin 80 illik yubileyi qeyd olunub
Göyçay Dövlət İdarəetmə və Texnologiya Kollecinin yaranmasının 80 illik yubileyi münasibətilə tədbir keçirilib.
"Azərbaycan müəllimi" xəbər verir ki, tədbir iştirakçıları ilk növbədə Ümummilli Lider Heydər Əliyevin və torpaqlarımızın azadlığı uğrunda canından keçmiş şəhidlərimizin abidəsini ziyarət edərək, dərin ehtiramlarını bildiriblər. Yubiley tədbirində respublikamızın müxtəlif bölgələrində yerləşən kollec rəhbərləri, rayon ictimaiyyətinin nümayəndələri, müəllim və tələbə heyəti iştirak edib.
Tədbir çərçivəsində rəsmi çıxışlar dinlənilib, kollecin 80 illik zəngin tarixini əks etdirən videoçarxlar nümayiş olunub, tələbələrimizin hazırladığı maraqlı bədii hissə təqdim edilib.
Tədbir zamanı uzun illər təhsil sahəsində fədakarlıqla çalışan müəllimlərimiz və kollecin ictimai həyatında fərqlənən fəal tələbələrimiz təltif olunublar. Daha sonra region kolleclərində qarşılıqlı əlaqələrin və tədrisin keyfiyyətinin artırılması məqsədilə kolleclər arasında əməkdaşlıq müqaviləsi imzalanıb.
Tədbirin sonunda xatirə şəkilləri çəkilib.
