Məktəb partasından qlobal elmə - Alpər Qəribin uğur hekayəsi
Bəzən bir uğur xəbəri təkcə fərdi nailiyyət kimi deyil, bütövlükdə cəmiyyətin intellektual potensialını və gələcəyə olan inamını əks etdirən mühüm hadisə kimi dəyərləndirilir. Belə uğurlar illərlə davam edən məqsədyönlü zəhmətin, ardıcıl inkişafın və yüksək motivasiyanın nəticəsi olaraq formalaşır və gənc nəslin imkanlarını və nələrə qadir olmasını aydın şəkildə nümayiş etdirir. Məhz belə bir nailiyyətin müəllifi 132–134 nömrəli Təhsil Kompleksinin şagirdi Alpər Qəribdir. O, uğura imza ataraq ABŞ-nin ən nüfuzlu ali təhsil ocaqlarından biri olan Kaliforniya Universitetinin “Data elmi” ixtisasına qəbul olunmaqla həyatında yeni bir səhifə açıb.
Alpərin qazandığı bu nailiyyət illərlə davam edən gərgin zəhmətinin məhsuludur. İnformatika və riyaziyyat sahələrində həm yerli, həm də beynəlxalq müsabiqələrdə qazandığı çoxsaylı qələbələr gəncimizin eyni zamanda istedadının bariz göstəricisidir. Orta təhsil illərində yalnız akademik nailiyyətlərlə kifayətlənməyən Alpər ictimai fəaliyyətlərdə də fəallığı ilə seçilərək məktəb rəhbərliyi tərəfindən dəfələrlə fəxri fərmanlarla təltif olunub.
Gənc yaşına baxmayaraq Alpər artıq elmi mühitdə də öz sözünü deməyi bacarıb. Monoqrafiya müəllifi kimi o, araşdırma dünyasına addım ataraq düşüncələrini elmə çevirməyi öyrənib. Proqramlaşdırma sahəsində isə o, sadəcə öyrənən deyil, yaradan tərəfdə yer alıb, müxtəlif layihələr üzərində çalışaraq süni intellekt sahəsində də öz izini qoymağa başlayıb. Belə ki, Alpər proqramlaşdırma sahəsində biliklərini davamlı inkişaf etdirərək bu istiqamətdə bir sıra uğurlara imza atıb və müasir texnologiyalara olan marağını real layihələrdə tətbiq edərək süni intellekt (AI) istiqamətində də müxtəlif layihələr üzərində çalışıb.
Qeyd edək ki, Kaliforniya Universitetinə daxil olan Alpər Qərib dünyanın digər nüfuzlu universitetlərindən də qəbul alıb, bəzi müraciətlərinin nəticələri isə hələ açıqlanmayıb. Onun əldə etdiyi bu uğurlar Azərbaycan gəncliyinin potensialını bir daha nümayiş etdirir və gələcək üçün böyük ümidlər vəd edir.
