“Biz tez-tez dayanıqlılığın praktik tərifini unuduruq. Mənim üçün dayanıqlılıq düzgün olanı düzgün şəkildə uzun müddət etmək deməkdir, etik prinsipləri, sosial məsuliyyəti daxil və resurslardan daha səmərəli istifadə etməkdir”. 

“Azərbaycan müəllimi" xəbər verir ki, bunu Azərbaycan Dövlət Neft və Sənaye Universitetinin rektoru Rüfət Əzizov Bakıda keçirilən “THE Avrasiya Universitetləri Sammiti”nin ikinci günündə “Avrasiya universitetləri iqlim fəaliyyətini necə təşkil edir” mövzusuna həsr olunmuş panel müzakirə zamanı deyib.

O bildirib ki, bu yanaşma gündəlik rutinlərə və müəssisələrin strategiyasına daxil edilməlidir:

“Dayanıqlılıq yalnız layihələr başlatmaq, bəzən təşəbbüslər həyata keçirmək və ya xüsusi tədris proqramları hazırlamaq deyil. Əksinə, dayanıqlılıq iqlim dəyişikliyi, yeni və alternativ enerji mənbələri də daxil olmaqla, universitetin əsas strategiyasının bir hissəsi olmalıdır. Məsələn, Azərbaycanda dayanıqlılıq və davamlı inkişaf bu elementlərin hamısını əhatə edərək universitetin strateji inkişafının bir hissəsi olmalıdır”.

Onun sözlərinə görə, bu il beynəlxalq reytinqlərində Azərbaycanın 28 universiteti yer alıb. Azərbaycanda yalnız 52 universitet olduğu halda, yarıdan çoxu reytinqə daxil edilib. Eyni zamanda, Qazaxıstandan 36 və Özbəkistandan 59 universitet reytinqə daxil edilib:

“Bu bölgədə dayanıqlılıq və iqlim dəyişikliyi getdikcə daha vacib mövzuya çevrilir. Əslində, müasir dünyamızda İT texnologiyaları artıq müxtəlif mexaniki, fiziki və bioloji sistemlərdə, eləcə də təhsilin bütün məzmununda tətbiq edilməyə başlanılıb. Bu il Strasburq Universiteti ilə birlikdə Su İdarəetmə Resursları üzrə magistratura proqramına başladıq. Bu həmçinin ikili diplom proqramıdır. Bunlar proqram əsaslı uğurlu nümunələr olsa da, dayanıqlılıq hər bir universitetin strateji planlaşdırmasının rutin elementi olmalıdır”.