"Bu gün insan yetişdirməkdən söhbət gedirsə, şəxsiyyət amili məktəbəhazırlıq prosesindən, birinci sinifdən başlayaraq ali təhsilin son pilləsinədək ön planda dayanmalıdır".

Bunu "Azərbaycan müəllimi"nə müsahibəsində millət vəkili Elçin Mirzəbəyli deyib.

"Atomla bağlı sevdiyim bir fikir var, “İşıqlı düşüncənin daşıyıcısısansa, şəxsiyyətsənsə, atoma enerji mənbəyi kimi baxacaqsan, əks təqdirdə, dağıdıcı silah kimi”. Söhbət həm də milli-mənəvi dəyərlərə, ölkənin taleyinə münasibətdən, vətəndaşlıq qayəsindən gedir".

O əlavə edib ki, insan şəxsiyyət kimi formalaşmayıbsa, nə qədər böyük elmi olursa-olsun, nəinki cəmiyyətə, ailəsinə də faydalı ola bilməz:

"Fikrimcə, şəxsiyyət yetişdirilməsi prosesində boşluqlar var və onların aradan qaldırılması üçün təhsil prosesində, dərsliklərdə ciddi islahatlar aparılmalıdır. Elm və təhsil naziri Emin müəllim də bu məsələlərdən bəzilərinə toxundu. Xüsusən, “Azərbaycan tarixi” kitabları ilə bağlı dediyi fikirləri çox bəyəndim. Çünki yanaşma tərzi doğrudur. Tarix dərsliklərində tarixin anlaşılan dildə deyil, ağır cümlə və ifadələrlə təqdim edilməsi uşaqları tarix kitablarından uzaqlaşdırır. Kiçik hekayələrlə tarixi anlatmaq, sevdirmək lazımdır. Bu yolla məktəblilərin tarix haqında fikirlərinin formalaşmasına nail olmaq mümkündür".

Millət vəkili qeyd edib ki, “Azərbaycan dili”, “Ədəbiyyat” dərsliklərinin məzmununa yenidən baxmaq lazımdır:

"Məzmunun təhsil prosesinin məqsədinə uyğun olması ilə yanaşı, ideoloji yükü də önəm kəsb edir. Şəxsiyyətin formalaşması amili təhsilin hər pilləsindən, hər dərs kitabından, bu kitablarda təqdim edilən kontentdən keçir. Hər məzmun şəxsiyyətin formalaşması prosesində iştirak etməlidir".