Bu gün “THE Avrasiya Universitetləri Sammiti” çərçivəsində “ProQuest Central” akademik informasiya bazasının rəsmi açılış mərasimi keçirilib. Mərasimdə universitetlərin nümayəndələri, “Clarivate” şirkətinin satış üzrə mütəxəssisləri, həmçinin Azərbaycanda fəaliyyət göstərən kitabxanaların təmsilçiləri iştirak ediblər. 

Tədbirdə çıxış edən Elm və Ali Təhsil üzrə Dövlət Agentliyinin direktoru Ülkər Səttarova bildirib ki, nüfuzlu şirkət olan “Clarivate” ilə ölkə səviyyəsində əməkdaşlıq mövcuddur:

“Bu sammit çərçivəsində Azərbaycanda “Clarivate” nümayəndələrini qarşılamaq böyük məmnunluq doğurur”.

Daha sonra layihə barədə geniş təqdimatla çıxış edən “Clarivate” şirkətinin məsləhətçisi İltifat İbrahimov qeyd edib ki, 2024-cü ildə əməkdaşlıq genişmiqyaslı abunəliyə çevrilib:

“Bu addımla Azərbaycanın bütün universitet və tədqiqat müəssisələrinə “Web of Science” platformasına çıxış imkanı yaradıldı. Bu isə Azərbaycan elminin beynəlxalq miqyasda mövqelərini gücləndirir”.

Onun sözlərinə görə, “ProQuest Central”ın milli səviyyədə istifadəyə verilməsi ilə 47 çoxşaxəli verilənlər bazasına, 43 min tam mətnli jurnal, 3,5 milyon ön çap məqaləsi, təxminən 400 min dissertasiya (o cümlədən bəzi Azərbaycan dissertasiyaları), qlobal xəbər arxivi, bazar hesabatları, konfrans materialları və s. çıxış imkanı əldə olunub.

Tədbirin sonunda isə “ProQuest Central” bazasının istifadəsinə dair təqdimat keçirilib və iştirakçılara sistemin imkanları barədə ətraflı təlim xarakterli məlumat verilib.